Laugarren urtez jarraian, Loraldia Plaza Zaratamo-Arrigorriaga jaialdiak "Marea Gora" lelopean euskal kulturaren indarra eta aniztasuna ospatuko ditu urriaren 17tik 26ra. Gabriel Arestik amestutako “itsaso urdin eta zabal” horri keinu eginez, jaialdia bi udalerrietan errotutako ezinbesteko hitzordu gisa finkatu da, sormen garaikidearen epizentro bihurtuz.
Arrigorriagako Udalean aurkeztu da gaur Loraldia Plaza Zaratamo Arrigorriaga kultur jaialdiaren 4. edizioa. Zaratamo eta Arrigorriagako Udalek sustatuta, Loraldiak antolatzen du, Bilboko festibaleko eredua hona ekarriz; Bizkaiko Foru Aldundia eta Laboral Kutxa dira babesleak; eta NAIZ hedabidea da babeslea.
Gaur goizeko aurkezpenean parte hartu dute: Maite Ibarrak, Arrigorriagako alkateak; Alberto Ugarrizak, Zaratamoko alkateak; eta Amaia Ocerinek, Loraldiko komunikazio arduradunak.
Laugarren edizio honekin, Loraldia Plaza Zaratamo-Arrigorriaga estrategia sendo baten erakusle da: euskarazko sorkuntza artistikoa zabaldu eta kultur transmisioa aktiboki sustatzea. Jaialdia erabat finkatuta dagoen honetan, gure balio nagusietako bat diziplina ezberdinen arteko fusioa da, publikoari esperientzia bakarrak eta berritzaileak eskainiz. Era berean, programazioak zubiak eraikitzen ditu belaunaldien artean, ibilbide luzeko artista sagaratuak eta talentu berriak eszenatoki berean elkartuz. Batasun honek gure kulturaren iragana ohoratzen du, oraina ospatzen du eta, batez ere, etorkizun sortzaile eta bizi bat bermatzen du.
