• Facebook
  • Twitter

Irailaren 14an Bizkaiko Foru Aldundiak Bizkaia Aurrera Kultura Bonuaren 26.800 ale kaleratuko ditu kulturaren kontsumoa sustatzeko

Eduki hau partekatu
  • Irailaren 14an Bizkaiko Foru Aldundiak Bizkaia Aurrera Kultura Bonuaren 26.800 ale kaleratuko ditu kulturaren kontsumoa sustatzeko
bizkaia.eus

  • DataIrailak 11
  • Gaia Ikusizko arteak, Arte eszenikoak, Musika, Ikus-entzunezkoa, Literatura, Museoak

Bizkaia Aurrera Kultura Bonua Kutxabanken webgunean eta bere sarrerak erosi eta jasotzeko terminalen sarean eskuratu ahal izango da 2020ko irailaren 14tik 2021eko maiatzaren 24ra bitartean. Bi bonu mota dira, 15 eta 25 euroan salgai jarriko direnak eta 40 euroko balioagatik trukatuko dira. Bonu hauek irailaren 14tik 2021eko maiatzaren 31ra bitartean erabili ahal izango dira soilik programari atxikitako establezimenduetan. Ekimenak Kutxabank eta CECOBIren laguntza jaso du.

Bizkaiko Foru Aldundiak Bizkaia Aurrera Kultura Bonua izeneko  26.800 bonu jartzen ditu salgai irailaren 14an sektoreak bizi dituen une zail hauetan kulturaren kontsumoa bultzatzeko. Bizkaia Aurrera Kultura Bonua Programaren bidez Bizkaiko Foru Aldundiaren Euskara, Kultura eta Kirol Sailak kultur produktuen erosketa sustatuko du, euskarri guztietan. Bizkaia Aurrera Kultura bonuak (BAKB) Kutxabank finantza-erakundearen bidez jarriko dira salgai eta erabiltzaileek Bizkaian hainbat kultur produktu erosteko aukera izango dute.

Bonu hauek irailaren 14an jarriko dira zirkulazioan, bi modalitatetan:

  • - A motako BAKB, 25 euroko prezioarekin, edozein motatako kultura-produktuetarako (B motako BAKBarekin eros daitezkeen produktuak eta zerbitzuak izan ezik). Kasu honetan 17.000 bonu jarriko dira salgai.
  • - B motako BAKB, 15 euroko prezioarekin, berariaz euskarazko kultur produktuentzat, hala nola liburuak, musika, filmak, dokumentalak, jokoak, bideo-jokoak, museoak, zinema, antzerkia, dantza, kontzertuak eta musikalak,…eta Bizkaiko tokiko hedabideetarako harpidetzak ere sartzen dira. Kategoria honetan 9.800 bonu jarriko dira salgai.

Bizkaia Aurrera Kultura Bonu guztiek berrogei euroko balioa emango diote eramaileari kultur produktuak erosteko, bai eta museo eta zuzeneko ikuskizunetarako sarrerak eta kanpaina honi atxikitako establezimendu-sareko beste kultura-ekitaldi batzuk erosteko ere, baldin eta BAKB horiek kanpaina honen barruan dauden egunetan erosi eta erabiltzen badira. Informazio guztia hemen kontsulta daiteke: https://www.bizkaia.eus/BizkaiaAurreraKulturaBonua

BAKB horien prezioaren eta erosketa-balioaren arteko aldea Bizkaiko Foru Aldundiak finantzatuko du  horretarako ezarri den funts ekonomikoa agortu arte. Programa honetara 500.000 € bideratuko dira.

Bonu hauen salmenta Kutxabanken webgunearen eta sarrerak erosi eta jasotzeko terminalen sarearen bidez egingo da. Kontsumitzaile bakoitzak kategoria bakoitzeko 4 BAKB erosi ahal izango ditu. Bonuak 2021eko maiatzaren 24ra arte erosi ahal izango dira, eta bakarrik erabili ahal izango dira programari atxikitako establezimenduetan, irailaren 14tik 2021eko maiatzaren 31ra bitartean.

"Ekimen honen bidez Bizkaiko Foru Aldundiak bultzada eman nahi dio kultur sektoreari, bizi dugun krisi soziosanitarioak gehien kolpatu duenetako bat delako, krisi larri hori gainditzeko eta sektorea ahalik eta lasterren indartzeko. Eta erronka honetan funtsezkoa da guztion lankidetza, erakundeena, zalantzarik gabe, baina baita herritarrena eta sektorearena berarena ere. Ezinbestekoa da kultura kontsumitzea bizirik iraun dezan. Eta horretara dator, hain zuzen ere, Bizkaia Aurrera Kultura Bonua, bere garaian Bizkaia Aurrera talka-planaren barruan planteatutako neurri-sortaren barruan iragarri zena, eta bultzatu ditugun beste neurri batzuekin batera garatu dena", adierazi du Lorea Bilbaok, Euskara, Kultura eta Kirol diputatuak.

Bizkaiko Foru Aldundiaren ekimena den Bizkaia Aurrera Kultura bonuak CECOBIren eta Kutxabanken laguntza du.

Informazio osoa iturriaren webgunean irakurri

Euskadi, auzolana